Hassan Koozagar by Noon Meem Rashid

Hassan Koozagar

by Noon Meem Rashid

jahān-zād nīche galī meñ tire dar ke aage

ye maiñ soḳhtā-sar hasan-kūzā-gar huuñ!

tujhe sub.h bāzār meñ būḌhe attār yūsuf

kī dukkān par maiñ ne dekhā

to terī nigāhoñ meñ vo tābnākī

thī maiñ jis kī hasrat meñ nau saal dīvāna phirtā rahā huuñ

jahāñ-zād nau saal dīvāna phirtā rahā huuñ!

ye vo daur thā jis meñ maiñ ne

kabhī apne ranjūr kūzoñ kī jānib

palaT kar na dekhā

vo kuuze mere dast-e-chābuk ke putle

gil-o-rañg-o-roġhan kī maḳhlūq-e-be-jāñ

vo sar-goshiyñ meñ ye kahte

hasan kūza-gar ab kahāñ hai?

vo ham se ḳhud apne amal se

ḳhudā-vand ban kar ḳhudāoñ ke mānind hai rū-e-gardāñ!

jahāñ-zād nau saal kā daur yuuñ mujh pe guzrā

ki jaise kisī shahr-e-madfūn par vaqt guzre

taġhāroñ meñ miTTī

kabhī jis kī ḳhushbū se vārafta hotā thā maiñ

sañg-basta paḌī thī

surāhī-o-mīnā-o-jām-o-subū aur fānūs o gul-dāñ

mirī hech-māyā ma.īshat ke iz.hār-e-fan ke sahāre

shikasta paḌe the

maiñ ḳhud maiñ hasan kūza-gar pā-ba-gil ḳhāk-bar-sar barhana

sar-e-chāk zholīdā-mū sar-ba-zānū

kisī ġham-zada devtā kī tarah vāhima ke

gil-o-lā se ḳhvāboñ ke sayyāl kuuze banātā rahā thā

jahāñ-zād nau saal pahle

tū nādāñ thī lekin tujhe ye ḳhabar thī

ki maiñ ne hasan kūza-gar ne

tirī qaaf kī sī ufuq-tāb āñkhoñ

meñ dekhī hai vo tābnākī

ki jis se mere jism o jaañ abr o mahtāb kā

rah-guzar ban ga.e the

jahāñ-zād baġhdād kī ḳhvāb-gūñ raat

vo rūd-e-dajlā kā sāhil

vo kashtī vo mallāh kī band āñkheñ

kisī ḳhasta-jāñ rañj-bar kūza-gar ke liye

ek hī raat vo kohrbā thī

ki jis se abhī tak hai paivast us kā vajūd

us kī jaañ us kā paikar

magar ek hī raat kā zauq dariyā kī vo lahr niklā

hasan kūza-gar jis meñ Duubā to ubhrā nahīñ hai!

jahāñ-zād us daur meñ roz har roz

vo saḳhtā-baḳht aa kar

mujhe dekhtī chaak par pā-ba-gil sar-ba-zānū

to shānoñ se mujh ko hilātī

(vahī chaak jo sāl-hā-sāl jiine kā tanhā sahārā rahā thaa)

vo shānoñ se mujh ko hilātī

hasan kūza-gar hosh meñ aa

hasan apne vīrān ghar par nazar kar

ye bachchoñ ke tannūr kyūñkar bhareñge

hasan ai mohabbat ke maare

mohabbat amīroñ kī baazī

hasan apne dīvār-o-dar par nazar kar

mere kaan meñ ye navā-e-hazīñ yuuñ thī jaise

kisī Dūbte shaḳhs ko zer-e-girdāb koī pukāre!

vo ashkoñ ke ambār phūloñ ke ambār the haañ

magar maiñ hasan kūza-gar shahr-e-auhām ke un

ḳharāboñ kā majzūb thā jin

meñ koī sadā koī jumbish

kisī murġh-e-parrāñ kā saayā

kisī zindagī kā nishāñ tak nahīñ thaa!

jahāñ-zād meñ aaj terī galī meñ

yahāñ raat kī sard-gūñ tīrgī meñ

tire dar ke aage khaḌā huuñ

sar-o-mū pareshāñ

darīche se vo qaaf kī sī tilismī nigāheñ

mujhe aaj phir jhāñktī haiñ

zamāna, jahāñ-zād vo chaak hai jis pe mīna-o-jām-o-subū

aur fānūs-o-gul-dāñ

ke mānind bante bigaḌte haiñ insāñ

maiñ insāñ huuñ lekin

ye nau saal jo ġham ke qālib meñ guzre!

hasan kūza-gar aaj ik toda-e-ḳhāk hai jism

meñ nam kā asar tak nahīñ hai

jahāñ-zād bāzār meñ sub.h attār-yūsuf

kī dukkān par terī āñkheñ

phir ik baar kuchh kah ga.ī haiñ

un āñkhoñ kī tābinda shoḳhī

se uTThī hai phir toda-e-ḳhāk meñ nam kī halkī sī larzish

yahī shāyad us ḳhaak ko gil banā de!

tamannā kī vus.at kī kis ko ḳhabar hai jahāñ-zād lekin

tū chāhe to ban jā.ūñ maiñ phir

vahī kūza-gar jis ke kuuze

the har kāḳh-o-kū aur har shahr-o-qariyā kī nāzish

the jin se amiir o gadā ke masākin daraḳhshāñ

tamannā kī vus.at kī kis ko ḳhabar hai jahāñ-zād lekin

tū chāhe to maiñ phir palaT jā.ūñ un apne mahjūr kūzoñ kī jānib

ġhil-o-valā ke sūkhe taġhāroñ kī jānib

ma.īshat ke iz.hār-e-fan ke sahāroñ kī jānib

ki maiñ is gil-o-lā se is rañg o roġhan

se phir vo sharāre nikālūñ ki jin se

diloñ ke ḳharābe hoñ raushan!